Миян кияс кужöны уджавны

Неважöн Сыктывкарса народнöй творчество да квалификация содтан шöринын помал i с ассьыс уджсö VIII республикаса том войтырлöн «Зарни кияс» выставка.

Выставка вылын вöлiны и Емдiн районса София Клочковалöн уджъяс. Сiйö велöдчö унатор вöчны аслас киясöн Айкатыласа культура керкаса «Сувениръяс ас киöн» клубнöй формированиеын, кодöн веськöдлö Валентина Овчинникова.

София ветлöдлö кружок вылö коймöд классянь. Сылöн уджъясыс век овлывлöны сиктса да районнöй выставкаяс вылын: «Айкатыла – менам сикт», «Радейтана Коми Республика да Емдiн район», «Зарни кияс». София сяммö велöдны пöрнöй да посни войтырöс вöчны шöртысь сувенир «Вишенки», а сiдз жö «Ангел хранитель» видзöг.

«Зарни кияс» республиканскöй выставка вылö София лöсьöдiс «Пелысь» акань-видзöгъяс, кодъясöс вöчис уна пöлöс техникаын: акань-гартöмъяс, гöрöдзъяс, сюръяяс, крестовина вылын. Аканьяс бура ладмисны öтувъя композицияö фанераысь вöчöм да коми серпасöн мичмöдöм керка водзын сулалöмöн. Композициясö позьö шуны «Менам керка бур видзöг улын».

Кöкъямысöд республикаса том войтырлöн «Зарни кияс» выставкаын уджъяс петкöдлöмысь Софиялы козьналiсны участниклысь диплом. Чолöмалам сiйöс медводдза ыджыд выставкакöд, сиам выль вермöмъяс да уна козин! Кутам лача, мый София и водзö кутас паськöдны ассьыс тöдöмлунъяссö да сямсö.

Сiдз жö кöсъям висьтавны ыджыд аттьö том йöзкöд уджысь Софиялöн наставниклы – Валентина Овчинниковалы! Миянлы зэв нимкодь, мый сiйö вöчö зэв колана удж – велöдö том войтырöс аддзыны асьнысö творчествоын да ас водзас пуктöм могъяссö пöртны олöмö. Выль вермöмъяс тiянлы да тiян воспитанникъяслы!

  ЕЛЕНА ФИЛИППОВА.